ភ្នំពេញ៖ នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានប្រកាសថា បច័្ចយដែលពុទ្ធបរិស័ទប្រគេនជូនវត្តបារមីវង្កតបុរីមានសរុបចំនួនជាង២២ម៉ឺនដុល្លារ។

ថ្លែងនៅក្នុងពិធីបុណ្យបញ្ចុះខណ្ឌសីមា និងឆ្លងសមិទ្ធផលនានាក្នុងវត្តព្រះបារមីវង្កតបុរីនាព្រឹកថ្ងៃទី២៤ ខែមេសា ឆ្នាំ២០២៣ សម្តេចតេជោបានមានប្រសាសន៍ថា៖«បច័្ចយនឹងប្រគេនព្រះតេជគុណ(វត្តបារមីវង្កតបុរី ហៅវត្តទួលក្រសាំង) ខ្ញុំព្រះករុណារំលឹកថា កុំស្ពាយលុយរត់ទៅតាម ព្រោះលុយហ្នឹងធំណាស់»។

ជាមួយគ្នានេះ សម្តេច និងភរិយាក៏បានប្រកាសប្រគេនបច្ច័យចំនួន៥ម៉ឺនដុល្លារ ហើយភរិយាសម្តេចវិបុលបញ្ញា សុខ អាន ប្រកាសប្រគេនបច្ច័យចំនួន១ម៉ឺនដុល្លារផងដែរ សរុបទាំងអស់បច្ច័យមានជាង២២ម៉ឺនដុល្លារ។

បើតាមសម្តេចតេជោ បច្ច័យជាង២២ម៉ឺនដុល្លារដែលប្រគេនជូនវត្តទួលក្រសាំង គឺសម្រាប់ឱ្យវត្តបន្តសាងសង់កុដិបន្ថែមទៀត។

គូសបញ្ជាក់ថា វត្តបារមីវង្កតបុរី ហៅវត្តទួលក្រសាំងដែលស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ត្រូវបានកែលម្អឡើងវិញដែលចំណាយថវិកាដែលជាបច្ច័យសរុបចំនួន១លានដុល្លារ៕